बीबीसीको प्रभावशाली महिला सूचीमा परेकी सपना बेलायतमा

लन्डन। कलिलो उमेरमा सामाजिक कार्यमा उदाहरणीय योगदान गरेर चर्चा कमाएकी सपना रोका मगर बेलायत आइपुगेकी छन्।

सन् २०२० मा बीबीसीको संसारभरका प्रेरणादायी एवम् प्रभावशाली महिलाको सूचीमा समावेश उनी मगर संघ बेलायतको निमन्त्रणामा बेलायत आएकी हुन्। 

विहीबार बेलुका लन्डन हिथ्रो एयरपोर्ट उत्रिंदा सपनालाई मगर संघ यूकेकी अध्यक्ष सीता पुन मगरलगायतका पदाधिकारीले स्वागत गरे।  

बेलायतमा रहंदा सपनाले संघले मगर दिवस एवम् माघे संक्रान्तिका अवसरमा आयोजना गर्ने विभिन्न कार्यक्रममा विशेष अतिथिको रुपमा भाग लिनेछन्। त्यस्तै, अरु भेटघाट तथा अन्तरक्रियाहरुमार्फत् पनि उनी बेलायतवासी नेपालीहरुसम्म पुग्दैछिन्।

सपना फाउन्डेसनमार्फत् आफ्नो सामाजिक कार्यलाई अगाडि बढाइरहेकी सपनाले फाउन्डेसन स्थापनाको उद्धेश्यका साथै भावी कार्ययोजनाबारे जानकारी गराउनेछिन्।

बेलायतवासी नेपालीहरुबाट फाउन्डेसनलाई सहयोग जुटाउने उद्धेश्य उनको छ। 

म्याग्दीकी सपनाले बेबारिसे शबहरुको व्यवस्थापन गर्दै आएकी छन्।