भूकम्पपीडितलाई ओएनएफ यूकेले पठायो एक लाख सहयोग

लन्डन– प्रवासी नेपाली मञ्च (ओएनएफ) यूकेले जाजरकोट र रुकुम पश्चिमका भूकम्पपीडितका लागि १ लाख रूपैया सहयोग पठाएको छ।

केही दिनअघि जाजरकोट केन्द्रबिन्दु भएर गएको भूकम्पबाट अति प्रभावित जाजरकोट र रुकुम पश्चिममा उद्धार तथा राहतका लागि मञ्चले उक्त रकम सहयोग गरेको हो।

सहयोग रकम मञ्चको अन्तराष्ट्रिय कमिटीको खातामा पठाइसकिएको र एनआरएनए आइसीसीको सहयोग अभियानमार्फत् पीडितहरुसम्म पुर्‍याइने मञ्चले जनाएको छ।

ओएनएफ यूकेले गत सेप्टेम्बरमा बेलायतमा गरेको सांस्कृतिक  कार्यक्रममा संकलन भएको कोषबाट भूकम्पपीडितलाई सहयोग गरिएको उक्त कार्यक्रमका संयोजक रहेका मञ्चका नेता पशुपति पोखरेलले जानकारी दिए।

यसअघि मञ्चको अन्तराष्ट्रिय कमिटीले पनि भूकम्पपीडितका लागि एनआरएनएमार्फत् तत्काल ५ लाख रुपैया सहयोग गर्ने निर्णय गरेको थियो।