बेलायतमा नेपाली मूलकी प्रीति लिम्बू बनिन् निर्विरोध काउन्सिलर

लन्डन । बेलायतको स्यान्डहर्स्ट टाउन काउन्सिलमा नेपाली मूलकी छोरी प्रीति लिम्बू काउन्सिलर बनेकी छिन् ।

गत बिहीबार सम्पन्न स्थानीय निर्वाचनमा स्यान्डहर्स्टको अल्स्मूर वडाबाट कन्जरभेटिभ पार्टीकी उम्मेदवार प्रीति निर्विरोध निर्वाचित भएकी हुन्। 

उक्त वडामा कञ्जरभेटिभ पार्टीबाट अन्य एक उम्मेद्वार निर्वाचित भएका छन् भने अन्य पार्टीका उम्मेदवार अन्तिम प्रतिस्पर्धाबाट पछि हटेका थिए । 

काउन्सिलर निर्वाचित प्रीति नेपाली मूलबाट बेलायतमा काउन्सिलर निर्वाचित हुने तेस्रो महिला हुन् । 

यसैपटक बेलायतको केन्ट मेडवे काउन्सिलबाट नीना गुरुङ काउन्सिलरमा विजय भएकी छन् भने यसअघि स्वान्ली काउन्सिलमा लक्ष्मी गैरे काउन्सिलर बनेकी थिइन्। 

यसपटक निर्वाचित दुवै महिला काउन्सिलरहरु गोर्खा परिवारका सदस्य हुन् ।