गोप्य अमेरिकी कागजात चुहावटबारे अनुसन्धान शुरु

वाशिङ्गटन, २६ चैत –अमेरिकी न्यायमन्त्रालयले शनिबार युक्रेनसँग सम्बन्धित अमेरिकी कागजातहरू ‘लिक’ भएकोबारे अनुसन्धान शुरु गरेको छ । चुहावट भएका कागजातहरूमा गोप्य खुफिया रिपोर्टहरू समेत समावेश छन् ।

त्यसैगरी ती कागजातहरूमा युक्रेन–रुस युद्ध लगायत अत्यन्त संवेदनशील विश्लेषणहरू पनि रहेको बताइएको छ । मन्त्रालयका प्रवक्ताले बताएका छन्, ‘हामी यस विषयमा रक्षा मन्त्रालयसँग सम्पर्कमा छौं र अनुसन्धान शुरु गरेका छौं।’

दर्जनौं लिक कागजातहरू र स्लाइडहरूको स्थिर ड्रिपले हालैका दिनहरूमा ट्विटर, टेलिग्राम, डिस्कोर्ड र अन्य सामाजिक सञ्जालमा सार्वजनिक गरिएको पाइएको छ । पेन्टागनले शुक्रबार सक्रिय रूपमा यस मामिलाको समीक्षा गरिरहेको बताएको छ ।

अमेरिकी अधिकारीहरूले वाशिङ्गटन पोस्टलाई बताएअनुसार केही कागजातहरू हेरफेर गरिएको देखिन्छ तर धेरै सीआइए विश्व खुफिया समीक्षा रिपोर्टहरूसँग मेल खान्छ जुन ह्वाइट हाउस, पेन्टागन र विदेश मन्त्रालय संयन्त्रमा छलफल गरिएको छ ।

रक्षा विश्लेषकहरूका अनुसार गोप्य कागजात चुहावट अत्यन्त संवेदनशील र मस्कोका लागि मूल्यवान सावित हुने पनि अनुमान गरिएको छ । अन्य कागजातमा अमेरिकी सहयोगीहरूको सरकारभित्रको आन्तरिक गोप्य जानकारी रहेको बताइएको छ ।

न्यूयोर्क टाइम्सका अनुसार कागजातहरूमध्ये युक्रेनमा प्रयोगको लागि संयुक्त राज्य अमेरिकाका तोपखाना गोलाहरू उपलब्ध गराउने कि नगर्ने भन्ने साथै दक्षिण कोरियाको वहसबारे छलफल पनि समावेश छ ।