नेपालब्रिटेन डटकमले सम्मानसहित १६ औं वार्षिकोत्सव मनाउने

लण्डन । बेलायतस्थित नेपाली समुदायका चर्चित १० अग्रजलाई ‘मिडिया पर्सनालिटी अफ दी एयर २०२३’ द्वारा सम्मानित गर्दै नेपालब्रिटेन डटकमले आफ्नो १६ औं वार्षिकोत्सव मनाउने तयारी गरेको छ ।

आगामी २१ मे का दिन हिथ्रोस्थित स्ट्यानवेल कम्युनिटी हलमा कार्यक्रम हुन लागेको हो । समारोहमा सहभागिताका लागि अनलाइनले बेलायतस्थित नेपाली समुदायसँग अनुरोध गरेको छ ।

कार्यक्रममा बेलायत तथा नेपालमा सक्रिय संचारकर्मीहरु, व्यवसायी तथा कलाकार, नेपाली दूतावास लण्डन, विश्वभर छरिएका गैरआवासीय नेपाली संघका प्रतिनिधि उपस्थित रहने अनलाइनका प्रधानसम्पादक चिरन शर्माले जानकारी दिए ।

शर्माले सम्मानित हुने व्यक्तिहरुको चयन विगतका वर्ष जस्तै पूर्णरुपमा पारदर्शी बनाइने दावी गरे । सो सम्मानका लागि जोसुकैले पनि आफूले चाहेको व्यक्तिलाई मनोनयन गर्न सक्ने उनले बताए ।

विगत १६ वर्षदेखि बेलायतबाट सन्चालित उक्त न्यूज पोर्टलले विशेषगरी गैरआवासीय नेपाली संघका गतिविधि समेट्दै आएको छ ।

नेपालब्रिटेन डटकमका संस्थापक अध्यक्ष चिरन्जीबी ढकालले अनलाइनले सफलतापूर्वक १६ बसन्त पार गरेकोमा खुशी व्यक्त गरेका छन् ।

बेलायतमा पहिलोपटक नेपाली भाषामा समाचार प्रकाशन गरेर व्यवसायिक पत्रकारिता सुरु गरेको जनाउंदै अनलाइनले लगातार समाचार पस्केर विश्वभरका नेपालीको मन जित्न सफल भएको ढकालले बताए ।