काठमाडौँ ओर्लिएलगत्तै विमानस्थलबाटै पक्राउ परे सन्दीप

तस्विर: अनलाइनखबर

काठमाडौं । बलात्कार आरोप लागेका नेपाली राष्ट्रिय  क्रिकेट टोलीका निलम्बित कप्तान सन्दीप लामिछानेलाई प्रहरीले पक्राउ गरेको छ । 

कतार एयरवेजको विमानबाट विहीबार बिहान त्रिभुवन अन्तर्राष्ट्रिय विमानस्थलमा ओर्लिएलगत्तै उनलाई पक्राउ गरिएको हो । उनलाई पक्राउ गरी हतकडी लगाएर विमानस्थलबाट बाहिर निकालिएको थियो।  

यसअघि सन्दीपले आफू आज स्वदेश फर्किन लागेको जानकारी सामाजिक सन्जालमार्फत् दिएका थिए । त्रिभुवन अन्तर्राष्ट्रिय विमानस्थलमा बिहान १० बजे नै ओर्लिने भने पनि खराब मौसमका कारण विमान अवतरण गर्न नसक्दा केहीबेर ढिलाइ भएको थियो । 

पक्राउ परेका सन्दीपलाई सिधै प्रहरी वृत्त गौशाला लगिएको छ। उनीमाथि नाबालिग किशोरी बलात्कारको आरोप लागेको छ।