लण्डनका चर्चित युवा निर्देशक कुशल श्रेष्ठको नयाँ म्यूजिक भिडियो सार्वजनिक

लण्डन । लण्डनका चर्चित युवा निर्देशक कुशल श्रेष्ठद्वारा निर्देशित नयाँ म्यूजिक भिडियो सार्वजनिक भएको छ । लण्डनकै गायिका सुमिता राईको ‘सुख खुशी’ गीतमा बनाइएको म्यूजिक भिडियो यसै साता सार्वजनिक भएको हो ।

निर्देशक श्रेष्ठको छायांकन, सम्पादन र निर्देशन रहेको उक्त म्यूजिक भिडियो सहनिर्देशन दीपिका श्रेष्ठले गरेकी छन् । नेपालको छायांकन विष्णु भट्टराईले गरेका हुन् भने कलरिस्ट नवीन निरौला र एरेन्जर राजु कार्की छन् । 

बेलायतका रमणीय स्थानमा छायांकन गरिएको देश प्रेमले ओतप्रोत गीतमा गायिका स्वयम र खरुन राईको अभिनय छ । ‘परदेशको ठाउँमा, मन त हजुर उतै हुन्छ आफ्नै गाउँ घरमा’ जस्ता मर्मस्पर्शी शब्दहरुले भरिएको गीतका शब्द सिर्जना हिमकला किरातीका हुन् भने गीतमा गंगाराज राईको संगीत छ ।

लामो समयदेखि बेलायतमा रहँदै आएकी गायिका सुमिताले गीतमा देश छोडेर परदेश जान कसैलाई पनि रहर नहुने तर भाग्यले को कहाँ पुगिन्छ त्यो टुंगो नहुने सन्दर्भ इंगित गरेकी छिन् । आफ्नो नयाँ गीत दर्शक स्रोताले रूचाइदिने विश्वास सुमिताको छ ।  

खोटाङमा जन्मिएर धरानमा हुर्किएकी सुमिता सन् २००३ मा बेलायत आइन् । सुमिताले टिनएजबाटै गाउन थालेकी थिइन् ।  उनको पहिलो एल्बम ‘सगुन ’ सन् २०१९ मा रिलिज भएको थियो जसमा ७ वटा गीत थिए ।

म्यूजिक भिडियो हेर्नुहोस्-