युएई हिरासतमा रहेका पत्रकार रिहाइका लागि परराष्ट्रमन्त्रीलाई ध्यानाकर्षण

तस्बिर- एएफपी

काठमाडौँ–संयुक्त अरब इमिरेट्स (युएई) प्रहरीले हिरासतमा राखेका नेपाली पत्रकार उमाकान्त पाण्डेलाई तत्काल रिहाइका लागि पहल गरिदिन युनिमी नेपालले परराष्ट्रमन्त्री डा. नारायण खड्कालाई अनुरोध गरेको छ ।

मिडियाकर्मीहरुको अन्तर्राष्ट्रिय संस्था युनिमी नेपालका अध्यक्ष गोविन्द धिताल नेतृत्वको टोलीले आज मन्त्री खड्कालाई ज्ञापनपत्र बुझाएर पत्रकार पाण्डेलाई तत्काल रिहाइका लागि पहल गर्न आग्रह गरेको हो ।

युएईमा रहेर पत्रकारितामार्फत नेपाल र नेपालीको पक्षमा आवाज उठाउँदै आएका युवा पत्रकार पाण्डेलाई लेखेकै आधारमा पक्राउ गरिनु अत्यन्त दुःखद भएको युनिमीको भनाइ छ ।

“पत्रकार पाण्डेको पक्राउका सम्बन्धमा युएईस्थित नेपाली दूतावासमा पटकपटक जानकारी गराई रिहा गर्न पहल गरिदिन परिवारका सदस्यहरुले आग्रह गर्दासमेत दूतावासले बेवास्ता गरेको थाहा हुन आएको छ”, ज्ञापनपत्रमा लेखिएको छ ।

नेपाली व्यवसायी र कामदारको संरक्षण गर्नुपर्ने दूतावासले नै त्यहाँ कार्यरत सञ्चारकर्मी नियोजितरूपमा पक्राउ पर्दासमेत बेवास्ता गर्नु अर्को आपत्तिजनक विषय बनेको युनिमीले जनाएको छ ।

युनिमीको ज्ञापनपत्र बुझेपछि मन्त्री खड्काले पत्रकार पाण्डेलाई रिहा गर्न आफ्नो तर्फबाट पहल भइरहेको र थप पहल गर्ने प्रतिवद्धता जनाएका थिए । उनले कुनै पनि नेपालीलाई विदेशी भूमिमा दुःख पर्दा नेपाली दूतावासले सहयोग र समन्वय गर्नु आधारभूत दायित्व भएकाले सोहीअनुसारको प्रयास हुने जानकारी दिए ।