बेलायतमा कोरोनाबाट मर्ने १५ प्रतिशतले बढे

लन्डन । बेलायतमा पछिल्लो एकसातामा कोरोनाका मृतक संख्या १५ प्रतिशतले बढेको छ । ‘डिपार्टमेन्ट अफ हेल्थ एण्ड सोशल केयर’ ले  मंगलबार सार्वजनिक गरेको तथ्यांक अनुसार २४ घन्टामा थप २९३ जना संक्रमितको मृत्यु भएको छ । यससंगै बेलायतमा कोरोनाबाट मृत्यु हुनेको संख्या एक लाख ४० हजार ९६४ पुगेको छ ।

दैनिक संक्रमितको संख्यामा भने केहि कमी आएको छ । लगातार ४० हजार माथि रहेको दैनिक संक्रमित संख्या ३३ हजार ८६५ मा झरेको छ । एकसाताको तुलनामा संक्रमित संख्या १०.४ प्रतिशतले घटेको हो । यसैगरी अस्पताल भर्ना हुनेको संख्यामा वृद्धि भएको छ । योसंगै बेलायतमा कुल संक्रमितको संख्या ९१ लाख ३० हजार ८५७ पुगेको छ ।

पछिल्लो २४ घन्टामा कोरोनाका कारण एक हजार दुई जना अस्पताल भर्ना भएका थिए । हाल अस्पतालमा उपचार गराइराखेका संक्रमितको संख्या ९ हजार ५३८ पुगेको छ । यस्तै एक हजार ३० जना संक्रमितको भेन्टिलेटर बेडमा उपचार भइरहेको छ ।

बेलायतमा १४.५ प्रतिशतले लगाए बुष्टर डोज

बेलायतमा १४.५ प्रतिशतले कोरोनाविरुद्धको तेस्रो अर्थात बुष्टर लगाएको स्वास्थ्य विभागले जनाएको छ । मंगलबार सार्वजनिक तथ्यांक अनुसार २४ घन्टामा दुई लाख ४० हजार ९४३ जनाले बुष्टर लगाएका छन् । हालसम्म ८३ लाख ५६ हजार १७२ जनाले उक्त खोप लगाइसकेका छन् ।

बेलायतमा हालसम्म कोरोनाविरुद्धको १० करोड ४१ लाख १२ हजार ७५७ डोज खोप वितरण भइसकेको छ । जसमध्ये पाँच करोड २५ हजार २० जना अर्थात ८७ प्रतिशतले खोपको पहिलो र ४ करोड ५७ लाख ३१ हजार ५६५ जना अर्थात ७९.५ प्रतिशतले खोपको दुवै डोज लगाइसकेको सरकारी तथ्यांकमा उल्लेख छ ।