नेता कलाकारको जमघटमा प्रवासी मञ्चको देउसीभैलो हुँदै, संकलित कोष च्यारिटीमा

लन्डन । नेकपा एमालेनिकट प्रवासी नेपाली मञ्च युरोप महादेशीय समितिको महिला विभागले बुधबार एक भर्चुअल देउसीभैलो कार्यक्रम गर्ने भएको छ ।  

नेपालबाट पार्टीका सिनियर नेता र चर्चित कलाकार समेतको सहभागिता रहने कार्यक्रमबाट संकलित रकम परोपकारी कार्यमा खर्च गरिने लक्ष्य छ ।

आयोजक प्रवासी नेपाली मञ्च युरोप महादेशीय समितिको महिला विभाग प्रमुख कल्पना त्रिपाठीका अनुसार बुधबार बिहान यूके समय बिहान ११ बजे र युरोप समय मध्यान्ह १२ बजे कार्यक्रम हुनेछ ।

कार्यक्रममा नेकपा एमाले प्रवक्ता एवम् पूर्वमन्त्री प्रदिप ज्ञवाली, विदेश विभाग प्रमुख एवम् प्रवास इञ्चार्ज राजन भट्टराई, सांसद कोमल ओली, प्रवासी नेपाली मञ्च ग्लोबल समिति अध्यक्ष भक्त गुरुङसहितका नेताहरुको सहभागिता रहनेछ ।  

कार्यक्रममा गायक वैकुण्ठ महत, कमेडियन राजा राजेन्द्र, गायिका प्रिया भण्डारी, कमेडियन पुरुषोत्तम भण्डारी ‘पुर्खे बा’, गायक अमित खाती लगायतका कलाकारले प्रस्तुति गर्नेछन् ।  

‘प्रवासी युरोप महिलाहरुको आह्वान, असहाय बालिका शैक्षिक अभियान’ भन्ने नारासहित देउसी भैलो कार्यक्रम गर्न लागिएको हो । कार्यक्रमबाट संकलित रकम नेपालमा विपन्न वर्गका बालिकाहरुको शैक्षिक सहायतामा खर्च गरिने आयोजक प्रवासी नेपाली मञ्च युरोप महादेशीय समितिको महिला विभाग प्रमुख कल्पना त्रिपाठीले बताइन् ।  

परोपकारी लक्ष्य राखिएको कार्यक्रममा सहभागिता तथा सहयोगका लागि आयोजकले आव्हान गरेका छन् ।