रुसमा कोरोनाबाट अहिलेसम्मकै बढीको मृत्यु  

मस्को, २० असोज– रुसमा बुधबार एकैदिनमा कोरोना भाइरसको संक्रमणबाट अहिलेसम्मकै सबैभन्दा धेरै जनाको मृत्यु भएको छ । अधिकारीहरुले दिएको जानकारीअनुसार बुधबार रुसमा ९२९ जनाको मृत्यु भएको हो । योसँगै रुसमा अहिलेसम्म कुल मृतक सङ्ख्या दुई लाख १२ हजार ६२५ पुगेको छ ।

कोरोनाभाइरसको डेल्टा भेरियन्ट फैलिएको र कोरोनाभाइरसविरुद्धको खोप लगाएकाहरुको सङ्ख्या कम भएकाले पनि मृतक सङ्ख्या अत्यधिक धेरै भएको बताइएको छ ।

अधिकारीहरुका अनुसार अहिलेसम्म रुसका ३० प्रतिशतले मात्रै कोरोनाभाइरस विरुद्धको पूर्ण खोप लगाएका छन् । यसअघि मंगलबार पनि अहिलेसम्मकै सबैभन्दा धेरैको मृत्यु भएको विवरण स्वास्थ्य अधिकारीहरुले सार्वजनिक गरेका थिए ।

रुसमा पछिल्लो समय कोरोनाभाइरसको महामारी थप फैलिंदै गएको छ ।