लन्डनबाट डायस्पोरा नेपाल डटकम शुभारम्भ

लन्डन । बेलायतबाट अनलाइन न्यूज पोर्टल डायस्पोरानेपालडटकम शुभारम्भ भएको छ । संयुक्त अधिराज्य बेलायतका लागि नेपाली राजदूत लोकदर्शन रेग्मी र गैरआवासीय नेपाली संघ (एनआरएनए) अन्तर्राष्ट्रिय समन्वय परिषद् (आइसीसी) का अध्यक्ष कुमार पन्तले वेबसाइट लग इन गरेर पोर्टल संयुक्त रुपमा उद्घाटन गरेका हुन् ।

आइतबार डायस्पोरानेपालको औपचारिक उद्घाटनपछि राजदूत रेग्मीले डायस्पोरानेपालले नेपाली समुदायमा उत्साहको संचार गर्न सकोस् भन्ने शुभकामना दिए । ‘सकारात्मक पत्रकारितामार्फत प्रेरणा हुने खालको समाचार विश्वभरका नेपालीले पाउन सकुन्’, उनले भने ।

गैरआवासीय नेपाली संघ (एनआरएनए) का अध्यक्ष कुमार पन्तले डायस्पोरानेपालले एकीकृत र समन्वयात्मक समाचारलाई लिएर अघि बढन सकोस् भन्ने शुभकामना दिए । उनले एनआरएनएले भूकम्प, नाकावन्दी र कोरोना अवधिमा नेपाल र नेपालीको हितमा गरेको कामको चर्चा गरे । उनले निर्धारित समयमा अधिवेशन गर्ने एनआरएनएको निर्णय सकारात्मक भएको भन्दै यस्ता विषयमा कलम चलाउन आग्रह गरे । अध्यक्ष पन्तले नेपालको आर्थिक समृद्धिमा गैरआवासीय नेपालीको ठोस योगदान भइरहेको र भविष्यमा पनि हुने प्रतिवद्धता व्यक्त गरे ।

संघका उपाध्यक्ष डा. बद्री केसीले डायस्पोरानेपालले आफ्ना समाचारहरुमा सबै क्षेत्र डाक्टर, व्यापारी, विद्यार्थी लगायतका विषय समेट्न सुझाव दिए । उनले व्यावसायिक र विश्वसनीय पत्रकारिताका लागि शुभकामना दिए ।

एनआरएनए सल्लाहकार कुल आचार्यले डायस्पोरानेपालले व्यावसायिक पत्रकारिता गर्ने आफूले अपेक्षा गरेको बताए । उनले प्रवासमा नेपाली कला संस्कृति, साहित्य, भाषा र भेषभूषाको संवर्धन गर्नुका साथै संसारभर छरिएर रहेका नेपालीलाई मातृभूमिसंग जोड्न एउटा पुलका रुपमा काम गर्न यो अनलाइनलाई सफलता मिलोस् भन्ने कामना पनि गरे।

संघका महासचिव डा. हेमराज शर्माले अनलाइन पत्रकारिताको दीगो विकासका लागि व्यावसायिक र निष्पक्ष पत्रकारिता गर्न सुझाव दिए । ‘अनलाइन समाचारहरुलाई पक्ष वा विपक्ष बनाउनु भन्दा दीगो विकास र व्यावयायिक पत्रकारिता गर्ने वातावरण बनाउन एनआरएनए अभियन्ताहरुसंग मेरो अनुरोध छ’, महासचिव शर्माले भने, ‘विवादित विषयमा समाचार तयार पर्दा सबै पक्षका भनाइ राखेर प्रकाशित गर्न म सम्पूर्ण पत्रकारहरूलाई आग्रह गर्दछु ।’

एनआरएनए सचिव गौरीराज जोशीले डायस्पोरानेपालले सबैलाई उचित स्थान दिन र सही सूचना पस्कन सकोस् भन्दै शुभकामना दिए । एनआरएनए प्रवक्ता डिबी क्षेत्रीले डायस्पोरानेपालले पत्रकारिता मार्फत गल्ती गर्दा सजग गराउन र राम्रो काम गर्दा प्रशंसा गरिदिन सुझाव दिए ।

त्यसैगरी, एनआरएनए युके अध्यक्ष प्रेम गाहामगर, एनआरएनए दक्षिण कोरियाका अध्यक्ष यज्ञराज सुवेदी, जर्मनीमा बसोबास गर्ने एनआरएनए अभियन्ता सन्तोष भट्टराई, एनआरएनए आइसीसी सदस्य रामशरण सिंम्खडा, बीबीसीका पूर्व पत्रकार भगीरथ योगी, एनआरएनए हङकङकी पूर्व अध्यक्ष राधिका गुरुङ, एनआरएनए युरोप उपसंयोजक कृष्ण तिमल्सेना, एनआरएनए ओसियाना क्षेत्रका पूर्व संयोजक धर्मराज अधिकारी, सामाजिक अभियन्ता शिवजी श्रेष्ठ, नेप्लीज नर्सेज एसोसिएसन यूकेकी अध्यक्ष सुनिता थापा, मध्यपूर्वकी एनआरएनए अभियन्ता यास्मिन वेगम, एनआरएनए यूके उपाध्यक्ष नारायण कंडेल, एनआरएनए आइसीसी सदस्य ललित न्यौपाने, अर्का आइसीसी सदस्य दयानिधि सापकोटा, एनआरएनए यूके सदस्य सपना खनियाँ, सामाजिक अभियन्ता एमटि लामा, नेपाल पत्रकार महासंघ यूकेका अध्यक्ष ध्रुवराज अर्याल, एनआरएनए यूकेका संस्थापक सदस्य बिपिन निरौला, नेपाल पत्रकार महासंघ बेल्जियमका अध्यक्ष ओम शर्मा, नेपाल पत्रकार महासंघ युरोपका उपाध्यक्ष राजकुमार थापालगायतले न्यूज पोर्टलको सफलताको शुभकामना दिएका थिए ।

अध्यक्ष रविन्द्र कंडेलको अध्यक्षतामा भएको समारोहमा प्रकाशक कृष्ण भण्डारीले उपस्थित प्रमुख अतिथि तथा अतिथिहरुलाई स्वागत गरेका थिए । डायस्पोरानेपाल डटकमका अध्यक्ष राजेन्द्र पुडासैनीले सञ्चालन गरेको कार्यक्रममा सम्पादकीय टिमका तर्फबाट सम्पादक श्याम लुईटेलले डायस्पोरानेपाल डटकमले सकारात्मक र व्यवसायिक पत्रकारितालाई मूलमन्त्र मानेर डायस्पोरामा पत्रकारिता गर्ने प्रतिवद्धता व्यक्त गरे ।