अफगानिस्तानबाट बेलायत ल्याइएका नेपालीलाई सहयोग वितरण

लन्डन । अफगानिस्तान तालिवानको कब्जामा आएसंगै उत्पन्न असहज परिस्थितिमा त्यहाँ कार्यरत सयौं नेपालीहरु अहिले बेलायत हुँदै नेपाल फर्किने क्रममा छन् ।

अफगानिस्तानमा बेलायती कम्पनीमा कार्यरत रहेका नेपालीहरुलाई कम्पनीहरुले नै बेलायत ल्याएर अब नेपाल फर्काउँदैछन् ।

यसैक्रममा बेलायत ‘ट्रान्जिट’ मा राखिएका केही नेपालीलाई यहाँका स्थानीय नेपालीहरुले सहयोग वितरण गरेका छन् ।

स्वीण्डनको जुरिस इन होटलमा राखिएका ५२ जनालाई स्थानीय नेपाली एशोसिएसन अफ वील्शायर, स्वीण्डनले खाना तथा लत्ताकपडा वितरण गरेको छ ।

एशोसिएसनका अध्यक्ष ज्ञानप्रसाद गुरुङले शुक्रबार समाजका प्रतिनिधिहरु होटलमै पुगेर सहयोग बाँडिएको जानकारी दिए । त्यसक्रममा उनीहरुलाई अन्य थप सहयोग आवश्यक परेमा समाजका तर्फबाट प्रतिवद्धता प्रकट गरिएको उनले बताए ।