एनआरएनए यूके निर्वाचन: अब प्रतिक्षा नतिजाको

लन्डन । एनआरएनए यूकेको नयाँ नेतृत्व चयनका लागि मतदान सकिएपछि यतिबेला नतिजाको व्यग्र प्रतिक्षा छ ।  

इतिहासमै पहिलोपटक यो वर्ष अनलाइनमार्फत् गराइएको मतदान सकिएको २४ घण्टा बितिसकेको छ । सोमबार मध्यान्ह शुरु भएर मंगलबार मध्यान्ह मतदान सकिएपनि नतिजा आउन बिहीबारसम्म लाग्ने निर्वाचन समितिले यसअघि नै बताएको छ ।  

निर्वाचनका लागि प्रयोग गरिएको ब्रिटिश भेन्डर ‘च्वाइस भोटिङ’ कै शर्तअनुसार नतिजा बिहीबार मात्रै प्राप्त हुने भएको निर्वाचन समितिले जनाएको छ । उक्त कम्पनीले बुधबार ‘डेमो’ नतिजा पठाउने र आवश्यक प्रमाणिकरणको प्रक्रियापछि बिहीबार अन्तिम नतिजा दिइने जनाएको बताइएको छ ।  

निर्वाचनमा कति प्रतिशत मत खस्यो भनेर समेत भेन्डरले अहिलेसम्म जानकारी नगराएको निर्वाचन समितिको भनाइ छ ।  

केही उम्मेद्वारहरु र तीनका समर्थकहरुले चांडै नतिजा सार्वजनिक गर्न निर्वाचन समितिसँग माग गरिरहेका छन्  ।  

तर अनलाइन मतदानका लागि भेन्डरसँग सम्झौता गरिसकेका कारण अब शर्तहरु परिवर्तन गरेर नयाँ कुरा माग गर्ने अवस्था नरहेको निर्वाचन समितिले बताउने गरेको छ ।  

त्यस्तै, भेन्डर कम्पनीले माग गरेअनुसार सबै उम्मेद्वारहरुको हस्ताक्षर अहिलेसम्म आइनसकेका कारण पनि नतिजा प्रकाशनको प्रक्रिया थप लम्बिन सक्ने चिन्ता गरिएको छ ।