पिटरबरो नेपाली समाजको नेतृत्व हरिहर भट्टराईलाई

लण्डन । पिटरबरो नेपाली समाजको अध्यक्षमा हरिहर भट्टराई सर्वसम्मत चुनिएका छन्।  २१ जुन सोमबार सम्पन्न विशेष भेलाले आगामी कार्यकालका लागि समाजको अध्यक्ष नेतृत्व गर्ने जिम्मेवारी भट्टराईलाई प्रदान गरेको हो । 

उक्त भेलामा निवर्तमान कार्यसमितिको आयव्यय प्रस्तुत गर्दै त्यस उपर सहभागीहरुबाट उठाइएका जिज्ञासाहरुलाई समाजका पूर्व अध्यक्ष शिव भन्डारीले प्रष्ट पारेका थिए ।

भेलाले आर्थिक प्रतिवेदन छलफल पश्चात् सर्वसम्मतिले पारित गर्‍यो । नेपाली राष्ट्रिय गान बजाई सुरु भएको भेलाका सहभागीहरुलाई समाजकी का.वा. अध्यक्ष श्रीमति संगीता कोइरालाले स्वागत गरेकी थिइन् ।

भेला संचालन महासचिव कृष्ण लुईटेलले र सभापतित्व समाजको ट्रष्टीका का.वा. संयोजक बाबुराम धितालले गरेका  थिए ।

भेलामा पूर्व अध्यक्ष लगायतका समाजका अग्रज व्यक्तिहरुकोसमेत उपस्थिति रहेको थियो । गोर्खा दरबार रेस्टुरेन्टमा सम्पन्न  भएको उक्त कार्यक्रममा  कोरोना महामारीलाई मध्यनजर गर्दै सामाजिक दुरी लगायतका नियमको पालना गरिएको थियो।