लन्डनका चर्चित ब्लगर लेक्सको नयां भिडियोमा समयौनिक पुरुषबीचको प्रेम

लन्डन । यूके निवासी नेपाली ब्लगर लेक्स लिम्बुले जुन १ तारिखका दिन आफ्नो नयां भिडियो ‘गौरव’ सार्वजनिक गर्दै गौरवको महिना मनाउँदैछन् । गौरव महिना विश्वभरका सिमान्तकृत यौन अभिमुखिकरण, लैंगिक पहिचान र यौन विशेषताका व्यक्तिहरुको उत्सवप्रति समर्पित छ ।

लिम्बु र आविस्कार राई अभिनित भिडियोमा दुईजना समयौनिक पुरुषहरुबीचको प्रेमलाई दर्शाइएको छ भने विशेष उपस्थितिका रुपमा लिम्बुका आफ्नै बुबाआमालाई समेत देख्न सकिन्छ ।

विज्ञापन शैलीको उक्त छोटो भिडियोको निर्देशन रामुना पुनले गरेकी हुन् भने सुसान्त विष्टको साउण्ड ट्रयाक म तिम्रोको समेत मिश्रण छ । उक्त भिडियोको छायांकन यूकेको ह्याम्पसायरमा चाउटन भिलेजमा गरिएको हो । लिम्बुले सन् २०१८ मा एउटा युट्युब भिडियो सार्वजनिक गर्दै आफ्नो यौन झुकावबारे सार्वजनिक गरेका थिए ।

लिम्बु भन्छन्– ‘सिमान्तकृत यौन अभिमुखिकरण, लैंगिक पहिचान र यौन विशेषताका व्यक्तिहरुप्रति र अहिलेसम्मको हाम्रा यात्राप्रति ध्यान केन्द्रित गर्न गौरवको महिना उत्तम तरिका हो । जब तपाईं आफू जो हो त्यसमा गर्व गर्न सक्नुहुन्छ, त्यो कति सुन्दर हुनसक्छ भन्ने यो छोटो भिडियोमार्फत मैले सार्वजनिक गर्न चाहेको हुँ । यद्यपि सुरुमा मैले मेरो भिडियोसँगै देखापर्ने व्यक्ति खोज्नका लागि संघर्ष गर्नुपरेको थियो । आविस्कार यो परियोजनाका लागि आउँदा म ढुक्क भएँ ।’

निर्देशक रामुना आफ्नो अनुभव बांड्दै भन्छिन्– ‘जब लेक्सले यो भिडियो गौरवका लागि मसंग सम्पर्क गरे, तब म कथाको सरलताबाट तुरुन्तै आकर्षित भएँ । व्यापक सन्दर्भमा यसको वजन निकै भारी थियो । तर चारैजना पात्रहरुबीच साटासाट गरिएको भावनाको तरलता वास्तविक, विश्वसनीय, कच्चा र सबैकुरा सरल बनाउने खालको छ । मैले यो कथालाई प्रेमका साथ बुझें र छायांकन गरें । म सबैले यो कथालाई यसैगरी स्वीकार गर्ने अपेक्षा गर्दछु । मेरा लागि गौरव भनेको तपाई आफू जो हो त्यही हुने र तपाईले जे चाहेको यो उसलाई प्रेम गर्ने धारणा हो । न त धेरै, न त अरु कुनै ।’

भिडियोमा गौरवको रुपमा अभिनय गरेका आविस्कार आफ्नो अनुभव बाड्दै भन्छन् –गौरवको महिनाले पहिले तपाईं आफैंमा को हो भन्ने स्वीकारोक्तिलाई प्रतिनिधित्व गर्छ । साथै तपाईंमात्र एक्लो हुनुहुन्न भन्ने महसुस गराउने चीजलाई प्रतिनिधित्व गर्छ । तपार्इं भन्न सक्नुहुन्छ कि किन मैले यो भिडियोमा काम गरें? यद्यपि नेपाली समुदायमा सिमान्तकृत यौन अभिमुखिकरण, लैंगिक पहिचान र यौन विशेषताका व्यक्तिहरुलाई सचेत बनाइएको छ तर मेरो विचारमा यो अझै पनि संवेदनशील विषय हो । यो भिडियो बनाएर र यसरी प्रस्तुत गरेर यसले मान्छेको सोचमा बिस्तारै परिवर्तन ल्याउने र मान्छेहरुलाई यस विषयमा अझ बढी सहज बनाउने आशा छ ।’

अमेरिका बाहिरका धेरै मानिसका लागि समयौनिक व्यक्तिहरुको अधिकारहरु परिवर्तन गर्न सफल प्रदर्शनका रुपमा परिचित स्टोनवाल विद्रोह भएको महिना जुन महिनालाई गौरवको महिनाका रुपमा छानिएको हो ।

पछिल्ला वर्षहरुमा जुन महिनाको दोश्रो शनिबारलाई ‘नेपाल गौरव यात्रा’ का रुपमा मनाइंदै आएको छ । सन् २०१९ देखि गौरव देखि गौरव यात्रा काठमाडौंमा मानिंदै आएको छ ।

(जानकारीका लागि लेक्स लिम्बु र आविस्कार राई वास्तविक जीवनमा प्रेम सम्बन्धमा छैनन्)

भिडियो-