राजदूत रेग्मीलाई स्वीन्डनका नेपालीको स्वागत

लन्डन । बेलायतका लागि नेपाली राजदूत लोकदर्शन रेग्मीलाई बेलायतको स्वीन्डन क्षेत्रमा बस्ने नेपालीहरुले स्वागत गरेका छन् ।  

नेपाली एशोसिएसन अफ वील्शायर, स्वीन्डनका प्रतिनिधिहरुले शुक्रबार लन्डनस्थित नेपाली दूतावास पुगेर राजदूत रेग्मीलाई संस्थाको तर्फबाट सम्मान तथा स्वागत गरे ।

त्यसअवसरमा एशोसिएसनका अध्यक्ष ज्ञानप्रसाद गुरुङले सम्मानपत्र हस्तान्तरण गरे । उनले राजदूतको बेलायतको कार्यकाल सुखद र सफल रहोस् भन्ने शुभकामना व्यक्त गरे ।

बेलायतको नेपाली राजदूतका रुपमा आएपछि पहिलोपटक स्वीन्डनका नेपाली भेटेका राजदूत रेग्मीले स्वागत तथा सम्मानका लागि धन्यवाद ज्ञापन गरे ।  

महामारीदेखि अन्य समयमा समेत स्वीन्डनका नेपालीहरुले गरेका परोपकारी तथा सामाजिक कार्यहरुको उनले प्रशंसा गरे ।  

त्यसअवसरमा नेपाली एशोसिएसन अफ वील्शायर, स्वीन्डनका तर्फबाट अध्यक्ष ज्ञानप्रसाद गुरुङ, श्रीमती उन्नति गुरुङ, उपाध्यक्ष खगेन्द्र गौचन र सहसचिव विष्णुकुमार गुरुङको उपस्थिति थियो ।