बेलायतमा गोर्खालाई भाषाको सास्ती: अंग्रेजी नबुझ्दा कोभिड खोप लिनै समस्या

नेपालीमै उपलब्ध खोपसम्बन्धि जानकारीबाट लाभान्वित गोर्खाहरु (तस्विर: साफा)

लन्डन । बेलायतस्थित कयौं भूतपूर्व गोर्खाहरुले अंग्रेजी भाषा नबुझ्दा कोभिड १९ विरुद्धको खोप लिन पनि सास्ती व्यहोर्न बाध्य बनेका छन् ।

कोभिड खोप लिनका लागि यहाँको नेश्नल हेल्थ सर्भिस (एनएचएस) बाट पठाइएको निमन्त्रणा पत्र (इन्भिटेसन लेटर) नबुझेर उनीहरुलाई समस्या भएको छ ।  

यस्तै समस्या भोग्न बाध्य बेलायतको रेडिङ क्षेत्रमा बस्दै आएका गोर्खाहरुका लागि कोभिड १९ खोपसम्बन्धि जानकारी नेपाली भाषामै उपलब्ध गराइएको छ ।  

अंग्रेजी भाषामा बांडिएको सूचना र जानकारीहरु बुझ्न कयौं गोर्खालाई अफ्टेरो भएपछि आर्मड् फोर्सेस च्यारिटी ‘साफा’
(एसएसएएफए) को सहयोगमा नेपाली भाषामै जानकारी प्रबन्ध गरिएको हो ।  

साफा रेडिङका पाम रेनोल्डका अनुसार अंग्रेजी भाषामा पठाइएको सूचना नबुझ्दा कतिपय गोर्खाहरुलाई समस्या परेको थियो । ‘एनएचएसले पठाएको पत्र नबुझेर उनीहरु अलमलमा हुन्थे, कसरी बुकिङ गर्ने भन्ने उनीहरुलाई केही थाहा हुँदैनथ्यो । कतिपटक उनीहरु खोप लगाउन भन्दै गलत केन्द्रमा पुग्ने, गलत समयमा पुग्ने गरेको पनि पाइएको थियो’, उनले भने ।

एनएचएसले नेपालीमै उपलब्ध गराएको जानकारी समेत कयौं गोर्खाहरुले बुझ्न नसकेपछि उनीहरुले बुझ्ने गरी नयाँ लिफलेट तयार पारेर बांडिएको साफाले जनाएको छ । जसमा खोपका लागि कसरी बुकिङ गर्ने, कसरी खोप केन्द्रसम्म पुगेर खोप लिने जस्ता जानकारी समावेश गरिएको थियो ।

नेपालीमै उपलब्ध खोपसम्बन्धि जानकारीबाट लाभान्वित गोर्खा र परिवार ( तस्विर: साफा)

साफानिकट चन्द्र बुराथोकी र भानु बुराथोकीको सहयोगमा तयार लिफलेटले धेरै गोर्खाहरुलाई सहयोग पुरयाएको साफाले जनाएको छ ।  

भाषाको कठिनाई परेका गोर्खाहरु खोपबाट बन्चित हुन नपारोस् भनेर स्थानीय स्वास्थकर्मीले पनि विशेष मद्धत गरिरहेको बताइएको छ ।  

बेलायतमा विभिन्न क्षेत्रमा स्थानीय नेपाली अगुवा एवम् संघसंस्थाहरुले पनि गोर्खाहरुलाई खोप दिलाउने कार्यमा स्वयमसेवी रुपमा सहयोग गरिरहेका छन् ।