एनआरएनए विशेष केन्द्रिय महाधिवेशन दुई बुंदे प्रस्ताव पारित गर्दै समापन

लण्डन । गैरआवासीय नेपाली संघ (एनआरएनए) को विशेष केन्द्रिय महाधिवेशन दुई बुंदे प्रस्ताव पारित गर्दै सकिएको छ । आइतबार संघका प्रवक्ता डिबी क्षेत्रीले ‘भर्चुअल’ रुपमा विशेष महाधिवेशनको निर्णय सार्वजनिक गरेका हुन् ।

जनवरी २३ र २४ मा सम्पन्न महाधिवेशनबाट संघको संशोधित विधान र आर्थिक प्रतिवेदन सर्वसम्मतिले पारित भएको थियो । विशेष महाधिवेशनमा संघको वार्षिक प्रतिवेदन महासचिव डा. हेमराज शर्मा, आर्थिक प्रतिवेदन संघका कोषाध्यक्ष महेशकुमार श्रेष्ठ र विधान संशोधन प्रस्ताव विधान संशोधन सुझाव समितिका संयोजक भूषण घिमिरे र संघका उपाध्यक्ष मन केसीले संयुक्त रुपमा प्रस्तुत गरेका थिए । ती प्रस्तावहरु सर्वसम्मतिले पारित भए ।

कोषाध्यक्ष महेश श्रेष्ठद्वारा प्रस्तुत आर्थिक प्रतिवेदन सर्वसम्मतिले पारित गर्दै संघमा आर्थिक व्यवस्थापन र पारदर्शिता कायम राख्न गर्नुपर्ने सुधार सम्बन्धमा सुझाव दिन गोवा कटुवालको संयोजकत्वमा रञ्जित महतो र डिला खरेल सदस्य रहेको एक समिति गठन गरिएको छ ।

त्यस्तै, विशेष महाधिवेशनमा प्रस्तुत गरिएको विधान संशोधनको प्रस्ताव सर्वसम्मतिले अनुमोदन गरेको थियो । महाधिवेशनको उद्घाटन परराष्ट्र मन्त्री प्रदिपकुमार ज्ञवालीले गरेका थिए ।

घोषणापत्रबारे विवाद

संघको इतिहासमै सम्भवतः पहिलो पटक प्रवक्ताले अधिवेशनको निर्णय २ पटक पढेर सुनाउनु परयो । सहमति विपरित घोषणापत्र तयार गरिएको भन्दै संघका सल्लाहकार कुल आचार्य, उपाध्यक्ष मन केसीलगायतले आपत्ति जनाएपछि उक्त घोषणापत्र फिर्ता भएको थियो ।

अर्का उपाध्यक्ष सोनाम लामाले नेपाली नागरिकताको निरन्तरताको पक्षमा आफूले गरेका कामहरु समेत घोषणपत्रमा नसमेटिएको भन्दै आपत्ति प्रकट गरे । उक्त घोषणापत्रमा महिला, युवा र नयाँ पुस्ताका बारेमा समेत केही नसमेटिएको भन्दै सहभागीले आक्रोस पोखेका थिए ।

सो लगत्तै आइइएस बैठकमा घोषणापत्रमा सहमति खोज्ने प्रयास गरेपनि सहमति हुन नसकेपछि दुई बुंदे घोषणा पत्र प्रवक्ता क्षेत्रीले दोस्रो पटक सुनाएका थिए ।

अध्यक्ष पन्तको समन्वयकारी भूमिका

संघ अध्यक्ष पन्तले घोषणापत्रलाई अन्तिम रुप दिन आइइएसमा बैठक चलिरहेको अवस्थामा असन्तुष्ट पक्षका रोशन थापा, जानकी गुरुड, शंकर खड्का, चिन्तामणि सापकोटा लगायतले व्यक्त गरेका सुझाव तथा धारणा सुने । उनले संघलाई राम्रो र उत्कृष्ट संस्था बनाउनु बाहेक आफ्नो कुनै स्वार्थ नरहेकाले सबैलाई समेटेर लाग्ने प्रतिवद्धता व्यक्त गरे ।

अध्यक्ष पन्तले आफूबाट गल्ती कमजोरी भए सच्याएर जान तयार रहेको भन्दै करिब चार घण्टा सबै सहभागी आइसीसी सदस्यहरु, सल्लाहकार तथा कार्यसमिति सदस्यहरुको विचार धैर्यतापूर्वक सुनेका थिए ।