वर्षभर सबैभन्दा बढी पढिएका नेपाली लिंकका १० समाचार

लण्डन । आज ईस्वी संवत २०२० को अन्तिम दिन । सारा विश्व नै कोभिड १९ को महामारीबाट प्रताडित बनेको यस वर्ष नेपाली लिंकमा समेत सबैभन्दा धेरै महामारीसम्बन्धी समाचार र जानकारीमूलक लेख, रचना नै प्रकाशित भए ।

नेपाली नयाँ वर्षको अवसर पारेर अप्रिल महिनाको १३ तारिखबाट औपचारिक प्रकाशन शुरु भएको नेपाली लिंकमा यस वर्ष सबैभन्दा बढी पढिएको विषयमा कोरोना महामारी एक नम्बरमा छ । त्यसपछि भूतपूर्व गोर्खा, ब्रेक्जिट, इमिग्रेसन र परोपकारसम्बन्धी सम्बन्धी सामग्रीहरु पनि बढी पढिएका छन् ।

नेपाली लिंकमा प्रकाशित समाचारहरुमध्ये यो वर्षभर सबैभन्दा बढी पढिएका समाचार कुन-कुन होलान् ?

सन् २०२० मा सबैभन्दा धेरैपटक पढिएका नेपाली लिंकका १० समाचारहरु यहाँ हामीले एकसाथ प्रस्तुत गर्ने जमर्को गरेका छौं ।(विस्तृत समाचार पढ्न शीर्षकमा क्लिक गर्नुहोस्) 

१ लण्डनको प्लमस्टिडबाट हराइरहेकी धनमाया मृत भेटिइन्

‘लण्डनको प्लमस्टिडबाट हराइरहेकी धनमाया मृत भेटिइन्’ शीर्षकको समाचार नेपाली लिंकमा सन् २०२० मा सबैभन्दा धेरै पढिएको समाचार हो । मे महिनाको १२ तारिखका दिन प्रकाशित यो समाचार फेसबुकमा पनि झण्डै २४ हजार पटक शेयर भएको छ ।

२ पूजा गर्दा बालेको बत्तीले जल्यो बेलायतमा नेपालीको घर

नेपाली लिंकमा यस वर्ष अत्याधिक पढिएका समाचारको दोस्रो नम्बरमा फार्नबरोमा एक नेपालीको घरमा भएको आगलागीसम्बन्धी समाचार छ । ‘पूजा गर्दा बालेको बत्तीले जल्यो बेलायतमा नेपालीको घर’ शीर्षकको समाचार हामीले भिडियो फुटेजसहित प्रकाशित गरेका थियौं ।

३ नातीको विहेलाई बेलायत आएका क्षेत्रीको कोरोनाबाट निधन

बेलायतमा कोरोनाका कारण नेपालीले ज्यान गुमाएका समाचारहरु यस वर्ष धेरै पढिएका छन् । जसमध्ये धेरै पढिएको सूचीमा तेस्रो नम्बरमा नातीको विहेका लागि बेलायत आएका वृद्धको कोरोनाबाट निधन भएको समाचार छ ।

४ बेलायतले खोल्यो वर्क परमिट, नेपालबाट पनि आवेदन दिन पाइने

बेलायतको इमिग्रेसनसम्बन्धी समाचार पनि यस वर्ष धेरै पढिएको समाचार हो । डिसेम्बरको शुरुदेखि बेलायतमा अंकमा आधारित इमिग्रेसन प्रणाली शुरु भएको विषयको समाचार धेरै पढिएको सूचीको चौंथो नम्बरमा छ ।

५ नटिङहममा आइसोलेसनमा बसेका पूर्व गोर्खाको मृत्यु

कोरोना संक्रमणबाटै ज्यान गुमाउने अर्का एक नेपालीसम्बन्धी समाचार पनि धेरै पढिएको सूचीमा पाचौं स्थानमा छ । बेलायतमा कोरोनाबाट ज्यान गुमाउने नटिङहमका शिव श्रेष्ठबारे ‘नटिङहममा आइसोलेसनमा बसेका पूर्व गोर्खाको मृत्यु’ शीर्षकमा हामीले समाचार प्रकाशन गरेका थियौं ।

६ बेलायतको फार्नबरोमा नेपाली महिलामाथि जातीय दुर्व्यवहार र आक्रमण

बेलायतको फार्नबरोमा एक नेपाली महिलामाथि भएको जातीय दुर्व्यवहारको समाचार धेरै पढिएकामध्ये छैठौं नम्बरमा छ । सडकमा हिडिरहेकी नेपाली महिलालाई बेलायती युवाहरुको समूहले जातीय दुर्व्यवहारसहित गालीगलौज गर्दै धकेलेर भूइंमा लडाएको समाचार नेपाली लिंकमा प्रकाशित भएको थियो ।

७ बेलायतमा प्रपर्टी व्यवसायमा जमेका कुबेर

नेपालीहरुले विभिन्न क्षेत्रमा प्राप्त गरेका सफलताका समाचारहरुमा पनि नेपाली लिंकका पाठकको चासो देखिएको छ । धेरै पढिएका समाचारको सातौं नम्बरमा बेलायतमा प्रपर्टी व्यवसायमा ठूलो सफलता हासिल गरेका कुबेर श्रेष्ठबारे तयार ‘बेलायतमा प्रपर्टी व्यवसायमा जमेका कुबेर’ शीर्षकको समाचार छ ।

८ ६७ वर्षको उमेरमा बेलायती विश्वविद्यालयबाट डिग्री

धेरै पढिएको सूचीको आठौं नम्बरमा ६७ वर्षको उमेरमा बेलायती विश्वविद्यालयबाट डिग्री हासिल गर्ने सुमलकुमार गुरुङसम्बन्धी सामग्री छ । ‘६७ वर्षको उमेरमा बेलायती विश्वविद्यालयबाट डिग्री’ शीर्षकको समाचार दुई साताअघि मात्रै प्रकाशित भएको हो ।

९ बेलायती सेनाको क्याप्टेन बनिन् भूतपूर्व गोर्खाकी छोरी अंशु गुरुङ

धेरै पढिएका समाचारमा नवौं नम्बरमा बेलायती सेनामा क्याप्टेन बनेकी अंशु गुरुङको स्टोरी छ । बेलायती सेनामा नेपाली महिलाले हासिल गरेको अहिलेसम्मकै ठूलो दर्जासम्बन्धी यो समाचार धेरै पाठकले मन पराएका छन् ।

१० यूके एनएचएसको सेक्युरिटी जिम्मा नेपाली कम्पनीलाई

वर्षभर सर्वाधिक पढिएका समाचारमध्ये दशौं नम्बरमा ‘यूके एनएचएसको सेक्युरिटी जिम्मा नेपाली कम्पनी’ लाई शीर्षकको समाचार छ । बेलायतमा नेपालीबाट सञ्चालित गोर्खा सेक्युरिटी कम्पनीले बेलायतको बर्कशायर तथा ह्याम्पशायर क्षेत्रस्थित एनएचएसलाई सेक्युरिटी उपलब्ध गराउनका लागि पाएको अवसरलाई नेपालीलिंकले समाचारका रुपमा प्रकाशन गरेको थियो ।