बाइडेनले पहिलो दिनमै गैरकानूनी आप्रवासीलाई नागरिकता दिने बिल संसदमा पठाउने

न्यूयोर्क । अमेरिकी राष्ट्रपतिका रुपमा कार्यभार सम्हालेको पहिलो दिन नै जो बाइडेनले अमेरिकामा रहेका झण्डै ११ मिलियन कागजपत्रविहिनलाई नागरिकताको बाटोमा लैजाने बिल सदनमा पठाउने योजना बनाएका छन् ।

बाइडेन अभियानका अधिकारीकाअनुसार कागजपत्रविहिनलाई ग्रिनकार्ड हुँदै नागरिकताको बाटोमा लैजाने बिल संसदको तल्लो सदन प्रतिनिधिसभामा पहिले पेश गरिनेछ ।

प्रतिनिधिसभामा डेमोक्र्याट्सहरुको बहुमत आउने उच्च सम्भावना छ । तर, सिनेटमा भने डेमोक्र्याट्सको बहुमत आउने सम्भावना त्यती देखिन्न । सिनेटमा अहिलेसम्म दुबै पार्टीले बराबर ४८-४८ सिटमा नियन्त्रण कायम गरेका छन् । बाँकी दुई सिटमा रिपब्लिकनको अग्रता रहेको छ भने दुई सिटमा जनवरीमा विशेष चुनाव हुने सम्भावना छ ।

सिनेटमा बहुमत कायम गर्न सकेमा पनि थोरै संख्यामा भएपनि रिपब्लिकन सिनेटरहरुमा बिलमा पक्षमा ल्याउन सकेमा भने बिल पारित हुने सम्भावना पनि रहनेछ । बाल्यकालमा अमेरिकामा आएका कागजपत्रविहिनलाई संरक्षण गर्न प्रदान गरिएको डाका कार्यक्रमलाई पनि बिलले समेट्नेछ । डाका र टीपीएसमा रहेकालाई ग्रिनकार्ड हुँदै नागरिकताको बाटोमा लैजाने बिलको मर्म हो ।

डाका कार्यक्रम तत्कालिन राष्ट्रपति बराक ओबामाले सुरु गरेका हुन् । त्यतिबेला जो बाइडेन उपराष्ट्रपति थिए । डाकाले झण्डै साढे ६ लाख बाल्यकालमा अमेरिकामा आएका कागजपत्रविहिनलाई संरक्षण प्रदान गरेको छ । जसमा नेपाली झण्डै ५ दर्जन छन् । टीपीएसबाहक नेपालीहरु भने झण्डै ९ हजारको हाराहारीमा छन् ।

ट्रम्प प्रशासनले डाका कार्यक्रम अन्त्य गर्न चाहेपनि सर्बोच्च अदालतले प्रकृया नपुगेको भन्दै तत्काल अन्त्य हुनबाट रोकेको थियो । बाइडेन प्रशासनले टीपीएसले समेटेका झण्डै ४ लाखलाई पनि सम्बोधन गर्ने योजना बनाएको छ ।  

पदभार सम्हालेकै पहिलो दिन बाइडेनले ट्रम्पबाट जारी यात्रा प्रतिबन्धहरु खारेज गर्ने योजना बनाएका छन् । ट्रम्पले यात्रा प्रतिबन्ध लगाएका १३ देशमा अधिकांश मुस्लिम बाहुल्य देशहरु छन् । सन् २०१७ मा कार्यभार सम्हाल्ने बित्तिकै ट्रम्पले यात्रा प्रतिबन्धको घोषणा गरेका थिए ।

त्यस्तै ट्रम्पले कोरोनाको महामारीको कारण देखाउँदै आप्रवासीहरुलाई ग्रिनकार्डमा अमेरिका आउन समेत डिसेम्बरको अन्त्यसम्म रोक लगाएका छन् । यो रोक ट्रम्पले थप्नसक्ने सम्भावना पनि छ । तर बाइडेनले कार्यभार सम्हालेपछि यो रोकलाई खारेज गर्ने योजनामा छन् । रोक खारेज भएमा डिभी, रोजगार वा परिवारमा आधारित ग्रिनकार्डमा अमेरिका आउन समस्या हुनेछैन ।

ट्रम्पले कामदार भिषामा कडाई गर्ने कैयन मापदण्ड ल्याएका छन् । बाइडेनले ती मापदण्डहरु पनि खुकुलो पार्ने योजना बनाएका छन् । ट्रम्प प्रशासनले सन् २०२१ का लागि अमेरिका भित्राउने शरणार्थीको संख्या १५ हजारमा झारेकोमा बाइडेनले १ लाख २५ हजार बनाउने योजना बनाएका छन् ।

मेक्सिको र अमेरिकाको सिमा क्षेत्रमा ट्रम्पले लगाइसकेको पर्खाल बाइडेनले भत्काउने छैनन् । तर आफ्नो कार्यकालमा थप एक इन्चपनि पर्खाल नलगाइने बाइडेनले बताएका छन् । सिमा क्षेत्रमा सुरक्षाका लागि आधुनिक मापदण्डहरु अपनाउने बाइडेनको योजना छ ।

सिमाक्षेत्रमा एसाइलम खोज्नेलाई मेक्सिको नै फिर्ता पठाउने नीति ट्रम्प प्रशासनले ल्याएको छ । बाइडेनले यो नीतिलाई खारेज गरी एसाइलममा गरिएको कडाई खुकुलो पार्ने योजना बनाएका छन् ।