कोरोनाले मृत्यु हुनेको संख्या दश लाख नाघ्यो

नयाँ दिल्ली । कोरोनाभाइरसका कारण विश्वभर मृत्यु भएकाहरुको संख्या दश लाखभन्दा बढी पुगेको छ ।

विश्वलाई नै प्रभावित पार्ने गरी नौ महिना अगाडिदेखि फैलिएको महामारीका कारण मानवीय क्षतिसँगै अन्य क्षेत्रमा पनि व्यापक नोक्सानी भएको छ ।

कोरोना महामारीले विश्व अर्थतन्त्रलाई नराम्रोसँग गाँजेको छ भने विश्वका नेताहरुको परीक्षा लिएको छ । त्यसैगरी विज्ञानलाई पनि कोरोना महामारीले चुनौती दिदै निरिह बनाएको छ ।

‘मृत्यु भएकाहरुको यो केबल संख्या मात्रै होइन, यसमा मानवीयताको कुरा छ, लाखौ मानिसको प्रेम जोडिएको छ, त्यसैले पनि यो धेरै फराकिलो र गहिरो छ’, चिकित्सा इतिहासका प्राध्यापक होवार्ड मर्केलले भने ।

मिचिगन विश्वविद्यालयमा कार्यरत मर्केलले यही कोरोना महामारीकै क्रममा ८४ बर्षिया आफ्नी आमालाई गुमाएका थिए।

‘निधन भएकाहरुको संख्यामा कोही हाम्रा दाइ छन्, कोही भाइ छन्, कोही हाम्रा दिदिबहिनी छन्, कोही बुवा आमा हुनुहुन्छ, त्यसैले यसले धेरैलाई प्रभावित पारेको छ । हामीमा मानवीयता छैन भने मात्रै यो संख्याले कुनै असर पार्दैन, नत्र यसले विक्षिप्त पार्दछ’, उनले भने ।

जोन हकिङ्स विश्वविद्यालयले सोमबार सार्वजनिक गरेको मृतकहरुको संख्या जेरुसेलम वा अस्टीनकोभन्दा धेरै भएको पनि उनले बताए ।

त्यसैगरी सन् २००४ मा हिन्द महासागर क्षेत्रमा आएको भूकम्प र आँधीले गरेको क्षतिभन्दा धेरै मानवीय क्षति भएको पनि उल्लेख गरिएको छ । औसतमा दैनिक पाँच हजार मानिसको कोरोनाभाइरसका कारण मृत्यु भइरहेको विवरणहरु सार्वजनिक भइरहेका छन् ।

बेलायत र युरोपेली मुलुकहरुमा महामारीको दोस्रो चरण चलिरहेको छ । संसारका अधिकांश देशमा अहिले पनि दैनिक रुपमा हजारौ मानिसको मृत्यु भइरहेको छ । पछिल्लो विवरण अनुसार कोरोनाका कारण विश्वभरी कुल मृतकको संख्या दश लाख छ हजार ४७१ पुगेको छ ।

त्यसैगरी, कुल संक्रमितको संख्या तीन करोड ३५ लाख ५७ हजार ९५९ पुगेको अधिकारीहरूले जानकारी दिएका छन् ।

कुल संक्रमितमध्ये दुई करोड ४८ लाख ८२ हजार १८६ जना संक्रमणमुक्त भएका छन् भने ७६ लाख ६९ हजार ३०२ जना अहिले पनि संक्रमित अवस्थामै छन् । कुल संक्रमितमध्ये ६५ हजार ३२५ जना मात्रै गम्भीर अवस्थामा छन् भने अरु ७६ लाख तीन हजार ९७७ जनाको अवस्था सामान्य छ ।

संक्रमितमध्ये सबैभन्दा धेरै अमेरिकामा छन् भने त्यसपछि भारत, ब्राजिल, रुस, कोलम्बीया, पेरु, स्पेन, मेक्सिको, अर्जेन्टीना र दक्षिण अफ्रिका क्रमशः अग्र दश मुलुकमा छन् ।