अमेरिकामा ४० लाख श्रमिकको पारिश्रमिक कटौती

वासिङटन, १८ असार–संयुक्त राज्य अमेरिकामा निजी क्षेत्रका कम्तीमा ४० लाख श्रमिकको पारिश्रमिक कटौती गरिएको छ ।

अमेरिकामा यस पहिलेका व्यापक मन्दीका समयभन्दा पनि कोरोना महामारीका समय अमेरिकी निजी क्षेत्रका श्रमिकहरूको पारिश्रमिक कटौती कम्तीमा दोब्बर सङ्ख्यामा भएको सिकागो बेकर फ्रेठम्यान इन्स्टिच्युटका श्रम बजारबारे विश्लेषण गर्दै आएका अर्थशास्त्रीहरूलाई उद्धृत गर्दै वासिङ्टन पोष्टले लेखेको छ ।

पारिश्रमिक कटौती खासगरी श्वेत अमेरिकीहरूले चलाएका उद्योगमा बढ्दो क्रममा छ । अमेरिकी श्रम बजारमा देखिएको यो अवस्थालाई हेर्दा अमेरिकी अर्थतन्त्रमा गहिरो आर्थिक सङ्कट तथा मन्द सुधारको सङ्केत मान्न सकिने उल्लेख छ ।

महामारीका कारण अमेरिकामा ६० लाखभन्दा बढी श्रमिकले पूर्णकालीन रोजगारीको चाहना राख्दाराख्दै पनि आंशिक रूपमा काम गर्नुपर्ने अवस्थामा पुगेका पनि अमेरिकी श्रम मन्त्रालयको तथ्याङ्कमा उल्लेख गरिएको छ ।

‘मेरो शुक्रबार छुट्टी छ तर मलाई पैसाको आवश्यकताका कारण म काम गर्न चाहन्छु’, न्यू जसीका डेनिज लेजीले भने । उनले अगाडि थपे, ‘मैले काम गर्ने एअर कन्डिसनसम्बन्धि व्यवसायिक संस्थाले मलाई मेरो साप्ताहिक पारिश्रमिकमा ७२० अमेरिकी डलरबाट घटाएर ५७६ अमेरिकी डलर बनाएको छ ।’ उनी महामारीका कारण अमेरिकामा पारिश्रमिक कटौतीको सामना गर्ने एक प्रतिनिधि पात्र हुन् ।

उनले भने, “वेतन कटौती अत्यधिक असामान्य बनेको छ । फर्महरूले सामान्यतया प्रशासनिक चुनौतीहरूको सामना गर्नेभन्दा पारिश्रमिक कटौतीलाई सहज समाधानका रूपमा लिएको पाइन्छ ।”

पत्रिकाका अनुसार केही व्यवसायले ५–५० प्रतिशत पारिश्रमिक कटौती गरी कम्पनी वा फर्ममा आश्रित कर्मचारीलाई धान्ने चलाखीपूर्ण निर्णयहरू गरेका छन् ।

गत वर्ष श्रम क्षेत्रमा ठूलो लाभ आर्जन गरेको अमेरिकामा महामारीका कारण देखिएको आर्थिक प्रभाबप्रति अर्थशास्त्रीहरूले चिन्ता व्यक्त गर्न थालेका छन् ।

श्रम बजारका विज्ञ तथा स्मिट फ्युचर्सका आर्थिक अनुसन्धान प्रवन्धक मार्था गिम्बेलले भने, ‘हामीलाई रोजगार वृद्धिको मामिलामा तेस्लाको मानव संशाधनको प्रमुखले विश्वव्यापी सङ्कटको क्रममा देखिएको पारिश्रमिक कटौतीलाई ‘साझा बलिदान’ भनेर चित्रण गर्नुभयो । दुबै साना र ठूला कम्पनीहरूले भुक्तानी काटिरहेका छन् ।’

पोष्टसंगको सहकार्यमा तयार एक तथ्याङ्कमा साना व्यवसायको लगभग एक तिहाइले र कामदारको तलब वा घण्टा कम्तीमा १० प्रतिशतले कटौती गरिएको पाइएको तेस्लाका गुस्टोले बताए । ‘थोरै गति देख्न लामो समय लाग्यो तर पछिल्लो अवस्थाले फेरि झस्काएको छ’, उनले भने ।

अध्ययन अनुसार कम्तीमा एक कामदारको पारिश्रमिक कटाउने व्यवसायहरू ९.५ प्रतिशत रहेका छन् भने २२ प्रतिशतले काम गर्ने समय कटौती गरेका छन् ।

अमेरिकामा तलब घटाउने कम्पनीहरूको सूचीमा जनरल मोटर्स, बजफिड न्यूज, ओक्सिडेन्टल पेट्रोलियम, एचसीए हेल्थकेयर, मास जनरल ब्रिघम, तेस्ला, सोथेबीलगायत छन् । ‘तलब कटौतीका कारण उच्च पारिश्रमिक भएका मजदुरहरुको लागि पुनर्भरण गर्न गाह्रो हुने देखिन्छ’, इन्डिड हाएरिङ ल्याबका अनुसन्धान निर्देशक निक बन्करले भने ।